Семинар мазмұнында Зияткерлік мектептерде жүзеге асырылып жатқан тәрбиелік және білім беру жобаларының тиімді тәжірибелері таныстырылады. Атап айтқанда, «Шаңырақ», «Ата-аналар университеті», «Қоғамға қызмет ету», «TEDx» сияқты жобалардың тәрбиелік әлеуеті талданады. Жобалық қызметтің оқушылардың тұлғалық дамуына, әлеуметтік белсенділігіне және азаматтық ұстанымының қалыптасуына әсері көрсетіледі. Сонымен қатар, тәрбие жұмысын ұйымдастыруда мектеп, ата-ана және қоғам арасындағы өзара ынтымақтастықтың маңыздылығы айқындалады.
Семинардың практикалық бөлімінде қатысушылар топтық жұмыстар мен интерактивті әдістер арқылы өз тәжірибелерін жетілдіруге мүмкіндік алады. Құндылықтарды анықтау, модельдеу, жобаларды жоспарлау және іске асыру жолдарын қарастыру бағытында нақты тапсырмалар орындалады. «Адал азамат» моделін құру және оны мектеп жағдайында жүзеге асырудың тиімді тетіктері талқыланады. Қатысушылар өз мектептерінің мүмкіндіктерін саралап, тәрбие жұмысының мазмұнын жетілдіруге бағытталған ұсыныстар әзірлейді.
