«Зерттеуші болуға үйретемін! Мектептегі зерттеушілік дағдыларды қалыптастыру жолдары»
Бұл вебинар жалпы білім беретін мектептердегі ғылыми жобалармен айналысатын мектеп оқушыларына жетекшілік ететін барлық пән мұғалімдеріне аптасына 1 немесе 2 сағатқа есептеліп 8 сағатқа жасалынған. Вебинар мазмұнының ерекшелігі дайын үлгілер негізінде нақты өнім алуға бағытталған.
Өзектілігі:
Қазіргі білім беру жүйесінің басты міндеті – оқушылардың функционалдық сауаттылығын арттыру, өмірлік жағдаяттарда өз білімін қолдана алатын, сыни ойлайтын, шығармашылықпен әрекет ететін тұлға қалыптастыру. Бұл талаптар аясында зерттеушілік дағдыларды дамыту – оқушылардың танымдық белсенділігін, ғылыми қызығушылығын, және дербес ойлау қабілеттерін арттырудың тиімді құралы ретінде танылады.
Білім берудегі жаңа үрдістер, атап айтқанда PISA, TIMSS, STEM сияқты халықаралық бағалау жүйелері де оқушылардың зерттеушілік құзыреттілігін жоғары деңгейде меңгеру қажеттігін алға тартады. Осы тұрғыда мұғалімнің зерттеушілік дағдыларды дамытудағы рөлі айрықша. Себебі мұғалім – оқушыны зерттеушілікке жетелейтін бағыттаушы, қолдаушы және шабыттандырушы тұлға.
Дегенмен, мектептегі тәжірибеде зерттеу жүргізу көбінесе тек ғылыми жоба форматында ғана іске асырылып, күнделікті сабақта жүйелі қолданылмайды. Бұл – педагогтар тарапынан зерттеушілік тәсілдерді жоспарлауға, қолдануға және бағалауға арналған кәсіби қолдаудың қажеттілігін көрсетеді. Осы мәселені шешу мақсатында семинар ұйымдастырылып отыр.
Мақсаты:
Қатысушыларды заманауи технологиялармен таныстыру, зерттеу жұмыстарын жүргізуді тиімді ұйымдастыра алуына, оқушылардың шығармашылық әлеуетін дамытудың әдіс-тәсілдерін меңгеруіне жағдай жасау.
Міндеттері:
• Зерттеушілік оқыту әдістемесінің теориялық негіздерін қарастыру;
• Оқушының зерттеушілік қабілетін дамыту жолдарын тәжірибе арқылы көрсету;
• Зерттеу тақырыбын анықтау, сұрақ қою, гипотеза құру, дерек жинау және талдау дағдыларын қалыптастыру;
• Мұғалімдерге арналған әдістемелік құралдар мен шаблондармен таныстыру;
• Практикалық тапсырмалар арқылы нақты мини-жобалар дайындауға мүмкіндік беру.
Күтілетін нәтиже:
Вебинар соңында педагогтар:
• Зерттеушілік оқытудың маңызын түсінеді;
• Оқушылармен зерттеу жүргізу процесін жоспарлай алады;
• Өз пәнінде зерттеушілік дағдыларды дамытуға арналған тапсырмалар мен жобалар құрастыра алады;
• Сабақ барысында зерттеушілік тәсілдерді жүйелі қолдануға ынталанады.
