Қайырлы күн! Мен Кенжебаев Айбек Егеубекович, Талдықорған қ. ПШО филиалының қазақ және ағылшын тілді тренерімін. Біліктілікті арттыру саласында жұмыс жасағаныма он жыл болды. Қазіргі уақытқа оннан аса түрлі біліктілікті арттыру бағдарламалары бойынша Республикамыздың екі мыңнан аса жалпы білім беретін мектептерінің мұғалімдері мен басшыларын және колледж мұғалімдерін оқыттым. Өзімнің оқыту тәжірибемнің нәтижесінде қалыптастырушы бағалауды қолдану, оқушылардың өзін-өзі реттеу дағдыларын дамыту және ағылшын тілі пәні мұғалімдеріне сыныптағы оқуды тиімді басқару бойынша бірқатар әдістемелік нұсқаулықтар мен ұсынымдар жаздым. Оқыту барысында мұғалімдердің сабақ жоспарын оқушылардың қажеттіліктері және оқу мақсаттары негізінде тиімді құрылымдау, оқушылардың оқуын бақылау дағдыларын, сабақтағы проблемалық жағдайларды талдап, өнімді шешім шығаруды үйренуге мән беремін. Сабақтың түрлі кезеңдеріне қалыптастырушы бағалау элементтерін және оқушылардың метатанымдық дағдыларын дамыту стратегияларын үздік зерттеулер негізінде енгізуге көмектесемін. Шет тілі мұғалімдерін оқытуда грамматика және сөздікті оқытуды тілдік дағдыларды оқытуға кіріктіруге басымдық беремін. Менің оқыту тәсілдерімнің бір артықшылығы оқу мақсаттарына қол жеткізуді жеңілдететін, үлгерімі төмен оқушылардың өзіндік тиімділігі мен ынтасын арттыратын, үлкен мақсаттарды кішкентай қадамдарға бөлу стратегияларын үйрету болып табылады.